ZAINDU ZAITEZ, ARGITU MUNDUA azken txanpa honetan erne ibiliz!

 Gure ikasturtea amaitzear dago, eta badakit azken azterketak eskalatzeko mendi zaila diruditela. Baina oso garrantzitsua den zerbait gogoratzea nahi dut: urte osoan jarritako ahalegina eta dedikazioa dira benetan kontatzen dutenak. Ez dira emaitzak bakarrik, egunez egun erakutsi duzuen konpromisoa eta iraunkortasuna baizik.

Funtsezkoa da azken une honetan erne egotea. Ikasteko eta hazteko garaiak izaten jarraitzen dute. Azterketa-ordu bakoitzak, berrikuspen bakoitzak eta egiten duzuen ahalegin gehigarri bakoitzak kontuan hartu.

Gainera, ez ahaztu zure osasun emozionala zaintzea. Estresa eta presioa handiak izan daitezke, baina oreka bat aurkitzea funtsezkoa da. Hartu momentuak erlaxatzeko, lagunekin edo familiakoekin hitz egiteko, eta gozatzeko jarduerak egiteko. Egoera emozional on batek hobeto kontzentratzen eta errendimendu ezin hobea ematen lagunduko dizue.

Gogoratu ez zaudetela bakarrik bide honetan. Gu, zuen irakasleok, zu laguntzeko gaude hemen. Azkenean, egunez eguneko lana, eta buru eta bihotz orekatuak edozein erronka gainditzeko aukera emango dizue. Fidatu zaitezte zeuon buruarekin, azkeneraino lan egin, eta ikusiko duzue zuen ahaleginak sarituak izango direla! Tira, ia lortu dugu eta! Animo!

ZAINDU ZAITEZ, ARGITU MUNDUA azken txanpa honetan erne ibiliz!

Zein da zure ‘aldapa’ aste honetan? Zer laguntzen dizu gora egiten?

Nazio Batuen Bake Langileen Nazioarteko Eguna

 Ebangelioan, Mateok honela esaten digu: “Zoriontsuak bakegileak, haiek Jainkoaren seme-alabak izango dira." (Mt.5,9)

Nazio Batuen Bake Langileen Nazioarteko Eguna Nazio Batuen Erakundeak (NBE) 2003an aldarrikatutako efemeridea da. Maiatzaren 29an aukeratu zen, erakunde horren lehen bake-misioa hasi zen eguna zelako, 1948an.

Nazio Batuen Bake Langileen Nazioarteko Eguna gogoratzea beharrezkoa da, batetik, bakea eta giza eskubideak defendatuz bizi diren langileei eskerrak emateko, eta bestetik, gure etorkizunaren alde lan egiten duten gizon-emakume horien baloreak sustatzeko. Bakea, garapena eta aliantzak ezin dira izan edonolako hitz hutsalak; bizitzan, esfortzuan eta jarrera egokietan oinarritu behar dira.

Gaur egungo munduan, gatazka eta liskar ugari daude, eta gure belaunaldiari dagokio bakea eraikitzea, elkarbizitza oinarri sendo baten gainean. Bake langileen lana ez da soilik misio diplomatiko bat; pertsona bakoitzaren eta komunitatearen artean elkar errespetatzea eta laguntzea beharrezkoa da. Horregatik, "Zaindu zaitez, argitu mundua BAKEA nonahi eramaten!" leloa ezin hobea da: bakoitzak bere ekintzekin eta bizitza errespetuaren bidez, mundu osoan aldaketa positibo bat sor dezake.

Bakea gure eskutan dago, eta egun hau aukera bat da gure inguruan bakea, elkartasuna eta ulermena lantzeko. Gure ekintzak, gure jarrera eta gure hitzak dira aldaketaren motorra.

ZAINDU ZAITEZ, ARGITU MUNDUA SANTA JUANAREN SUA BIZIRIK MANTENDUZ!

Zergatik bakea lortzea ez dela bakarrik Nazio Batuen langileen ardura, baizik eta gu guztion lana? Zer ekintza konkretu egin dezakegu gure inguruan bakea eta elkartasuna bultzatzeko?

ZAINDU ZAITEZ, ARGITU MUNDUA SANTA JUANAREN SUA BIZIRIK MANTENDUZ!

 

Egun on guztioi! Pasatu da gure aste handia, Santa Juana eguna ospatu dugu eta gogotsu murgildu gara Haitiri laguntzeko proiektuan. Baina, jaiak eta ospakizun bereziak amaitzen direnean, Santa Juanak gogorarazten digu: «Ez utzi inoiz itzaltzen piztu duzuen sua».

Gaurko gogoetan, gure barruko su hori nola zabaltzen den ikusteko, bideo bat ikusiko dugu:  "Maitasunaren Bumerana". Keinu txiki batek —hasieran garrantzi handirik ez duela dirudienak— kate-erreakzio bat sortzen du: norbaiti karga eramaten laguntzeak, erortzean eskua luzatzeak edo irribarre egiteak mundua alda dezake.

Hori da Santa Juanak irakatsi zigun eredua. Hark duela 400 urte "bumeran" hori jaurti zuen neskentzako eskolak sortu zituenean, eta bumeran horrek bueltaka jarraitzen du gaur egun gure ikastetxean. Orain, guri dagokigu kate horri jarraipena ematea:

1.   Haitiko proiektuarekin: Gure ekarpen txikiak “San Ignacio de Bedou” eskolako ume baten bizitza aldatuko du.

2.   Egunerokoan: Gelakideari lagunduz, jantokian eskerrak emanez edo norbait bakarrik ez uzten saiatuz.

Gogoratu: ematen dugun argia beti itzultzen zaigu, bumerana bezala. Gaur, izan zaitez zu kate horren hurrengo lotura.

Bideoan ikusi dugun bezala, keinu txiki batek kate bat hasten du. Zure ustez, zergatik kostatzen zaigu batzuetan lehenengo urrats hori ematea (irribarre egitea, laguntzea...)? Gogoratzen duzu norbaitek zure alde egin duen "keinu txikiren" bat zure eguna hobetu zuena? Zer sentitu zenuen?

SANTA JUANA eta HAITI

 Markos ebanjelariak hauxe esaten digu: “Jesus, gure laguna, ez da etorri zerbitzatua izatera, zerbitzari izatera baizik, bere bizia guztien alde ematen du”. Zein egoeratan ematen duzu zure buruaren onena?

“Santa JUANA” astea den honetan ONGI ETORRI beroena gurea hain propio den jai honetara. Bai, bestetan bezala JUANA gogoratuko dugu. Juanak ondo baitzekien ekintzek hitzek baino gehiago esaten dutela. Ba… Aste honetan keinu txikiak egitera gonbitea egiten dizugu: iribarre garbi bat, klaseko lagunarekin zintzo jokatu, etxean agian piska bat gehiago lagundu, HAITIko proiektuan lagundu…

Ikasturte honetan, FISCek HAITIn lan egitera gonbidatzen gaitu, San Ignacio de BEDOU izeneko eskolan, Mariaren Lagundiak duen eskola txikian laguntzen alegia. Azken urteotan Haiti oso herrialde zigortua izan da, lurrikarak eta zikloiak izan direla eta egoera politikoa zaila dela. Oso toki txiroa eta pobrea da eta gure laguntza behar dute aurrera egiteko.

Ez da lehenengo aldia eskolatik proiektu hau aurrera bultzatzen dugula. Orain zazpi urte proiektu honen inguruan aritu ginen eta, HAITIko eskola aurkezteko, ondoren ikusiko dugun bideoa prestatu genuen. HAITIko gure lagunek gure zain daude, lagundu ditzagun!

Orain bideo txiki bat ikusiko dugu. Istorio sinple bat da, oso laburra, baina mezu handia duena. Entzun adi eta pentsatu: zer egiten dut nik, bakarra banaiz ere? Zein keinu txiki egin dezaket HAITI hobetzeko?

ZAINDU ZAITEZ, ARGITU MUNDUA HAITI LAGUNDUZ!

Zer egiten dut nik, bakarra banaiz ere? Zein keinu txiki egin dezaket HAITI hobetzeko?

MAIATZA, SANTA JUANAREN HILABETEA

 

Egun on guztioi! Ondo dakigun bezala, maiatza hilabete oso berezia da gure eskolarentzat. Ba al dakizu zergatik? Lestonnaceko Santa Juanaren eguna ospatuko dugulako! Txiki-txikitatik askotan entzun diguzue irakasleoi haren inguruan hitz egiten eta egindako lan izugarria goraipatzen.

Hala ere, galderatxo bat egingo dizuet: ba al dakizue zergatik ospatzen den Santa Juana eguna maiatzean? 1949ko maiatzaren 15ean Pio XII. Aita Santuak Juana SANTUA egin zuelako. Aurten, gertaera horren 77. urtemuga ospatzen dugu.

Zer esan nahi du Santa Juana SANTUA izateak? Bada, haren bizitza eta izateko modua gu guztiok jarraitu beharreko EREDUA direla. Askotan entzuten dugu haren izena, baina ba al dakizue nolakoa zen benetan Santa Juana? Bada, gaur egun, guretzat oso baliagarriak diren hiru ezaugarri nagusi zituen:

1.    Ausardia eta indarra: Emakume ameslaria eta oso ausarta izan zen. Orain dela 400 urte baino gehiago, neskek ez zuten eskolara joateko eta ikasteko aukerarik. Berak hori ez zela bidezkoa pentsatu zuen eta, oztopo guztien gainetik, neskentzako eskolak sortzea erabaki zuen. Ez zuen amore eman.

2.    Enpatia eta "Eskua luzatzeko" prestutasuna: Santa Juanak beti jartzen zuen arreta une bakoitzeko beharretan. Norbait gaizki bazegoen, baztertuta bazegoen edo laguntza behar bazuen, beti zegoen eskua luzatzeko prest. Guk ere, gelan edo jolastokian norbait bakarrik, triste edo estresatuta ikusten badugu, gauza bera egin dezakegu: eskua luzatu.

3.    Pertsonak zaintzea: Berarentzat garrantzitsuena ez zen soilik liburuetako edukiak ikastea. Berak «bizitzan eta bizitzarako heztea» nahi zuen; hau da, pertsona onak izaten, elkar zaintzen eta etorkizunerako prestatzen irakatsi nahi zuen.

Beraz, gaurko gogoeta honetan, Santa Juanari ESKERRAK eman nahi dizkiogu. Eskerrak eman utzi zigun ereduagatik, eta pertsona gisa hazteko Irungo El Pilar Ikastetxean egoteko aukera dugulako.

ZAINDU ZAITEZ, ARGITU MUNDUA SANTA JUANAREN EREDUA JARRAITUZ!

Aipatu ditugun hiru ezaugarrietatik (ausardia, enpatia eta elkar zaintzea), zein uste duzue dela gaur egun gure gelan gehien behar duguna edo gehien landu beharko genukeena? Zergatik?

Maiatzaren lehena: Jai egun bat baino askoz gehiago

1. Zer da egun hau? "Kaixo guztioi! Laster Maiatzaren 1a da. Seguruenik, askok pentsatu duzue: 'Bikain! Ez dugu klaserik!'. Eta bai, atseden hartzea ondo dago, baina badakizue zergatik ez dugun eskolarik eta zergatik ez doazen zuen gurasoak lanera egun horretan? Maiatzaren lehena Langileen Nazioarteko Eguna delako."

2. Historia apur bat: "Imajinatu duela 100 edo 150 urteko mundua. Garai hartan, langileek ez zituzten gaur egungo eskubideak. Jendeak (baita zuek bezalako nerabeak ere!) 12, 14 edo 16 orduz lan egiten zuen egunero fabriketan. Ez zegoen astebururik, ez oporrik, eta gaixotuz gero, kaleratu egiten zituzten.

Baina langile batzuek esan zuten: 'Hau ez da bidezkoa!'. Protesta egin zuten, eta askok gogor borrokatu zuten (batez ere Chicagon, Estatu Batuetan) egunean 8 ordu lan egiteko, 8 ordu lo egiteko eta beste 8 orduz gozatzeko eskubidea lortzeko. Egun hori gogoratzeko ospatzen dugu Maiatzaren lehena."

3. Zergatik inporta zaigu guri? "Gaur egun ditugun gauza on asko ez ziren magiaz agertu. Batzuek borrokatu zutelako dauzkagu. Langileak gure gizartearen motorra dira: okinek, irakasleek, medikuek, kale-garbitzaileek, zaintzaileek... guztiek egiten dute posible gure bizitza erosoagoa izatea."

4. Etorkizunera begira": Zuek orain ikasleak zarete (hori da zuen oraingo 'lana'), baina etorkizunean langileak izango zarete. Eta oraindik badago zer hobetu: gizon eta emakumeek soldata bera irabaztea lan beragatik, lan seguruak izatea eta inor ez esplotatzea. Langileen eskubideak denon eskubideak dira."

Pentsatu: Zuen inguruan (gurasoak, osaba-izebak...) zein lanbide daude? Nola laguntzen diote lan horiek gizarteari? Etorkizunean lan egiten duzuenean, zer eskubide izatea gustatuko litzaizueke? (Adibidez: tratu ona, soldata duina...). Ez ahaztu ASKO BALIO duzula.

ZAINDU ZAITEZ, ARGITU MUNDUA zure LANAREKIN!

Zuen inguruan zein lanbide daude? Nola laguntzen diote lan horiek gizarteari? Etorkizunean lan egiten duzuenean, zer eskubide izatea gustatuko litzaizueke?

Nazioarteko liburuaren eguna

 "Liburuek irekitzen dizkiguten ateak"

Zein liburu gogoratzen duzu asko gustatu zitzaizuelako? Liburuko pertsonaia bazina, nor izango zinateke?

Nazioarteko Liburuaren Eguna UNESCOk 1995ean ezarri zuen, irakurketa eta egileak balioesteko. Egun berezi gisa apirilaren 23a aukeratu zuten, data horren inguruan hiru idazle haundi hil zirelako: Miguel de Cervantes, William Shakespeare eta Inca Garcilaso de la Vega. Horregatik ospatzen da egun honetan: literaturaren historian arrastoa utzi duten egileak oroitzeko eta irakurketaren balioa azpimarratzeko.

Liburuak ateak dira. Batzuek abenturara eramaten gaituzte, beste batzuek barre eginarazten digute, edo galderak egiten dizkigute. Baina denek ematen digute aukera bat: geure burua eta mundua hobeto ezagutzekoa.

Nazioarteko Liburuaren Egunean gogoratzen dugu irakurtzea ez dela bakarrik eskolako lan bat: bidaiatzeko modu bat dela, ikasteko aukera bat, eta bihotza lantzeko bidea. Irakurketak jakindurirako ateak zabaltzen dizkigu, esaera zaharrak liburuan esaten den bezala: “Jakinduria lortzea da gauzarik inportanteena.” (Prov.4,7)

Azken otoitza: “Jainko maitea, Liburuen bidez ikasteko eta hazteko aukera emateagatik eskerrik asko. Ireki gure bihotzak irakurketak dakarren jakinduriaz gozatzeko. Sor ezazu gugan kuriositatea eta jakiteko gogoa. Amen.”

ZAINDU ZAITEZ, ARGITU MUNDUA HITZEN INDARRAREKIN!

Gaur gogoratu: liburu bat irekitzea ez da orrialde bat pasatzea… zuretzako irekitzen den ate bat zabaltzea baizik. Zein liburu gomendatuko zenioke lagun bati? Zein gai atsegin duzu: misterioa, umorea, fantasia…?

Pazko Argia: Gure Bihotzak Pizten

Pazko Argia: Gure Bihotzak Pizten

Goizean ARGIA sortzen den bezala, Pazko garaian ITXAROPENA pizten da. Oporren ondoren, hemen gaude berriro: indar berrituekin, amets berriekin, bihotza zabaltzeko prest…

Aste honek oparia dakar: Pazkoaren jaia. 50 egunez ospatuko dugu bizitzak heriotzari irabazten diola, argiak iluntasunari. Jesus berpiztu da eta gure bihotzak piztu nahi ditu: pozerako, maitasunerako, esperantzarako…

Frantzisko Aita Santuak zioen bezala: 'Ez utzi zure aurpegia tristuraz iluntzen: argitu zure begirada, argitu zure bihotza eta besteak zure argiarekin argitu'.

Gaur, galdetzen dizut: Zer keinu txiki egin dezakezu gaur besteei argia emateko?

Bideo bat ikusiko dugu eta ikusi aurretik, keinu xinple bat pentsa ezazu: "egun on" animatuago bat esatea; bakarrik dagoenari hurbiltzea; Kexa bat ekiditea edota eskerrak ematea; norbaiti irribarre egitea…

Ikusiko dugun bideo honetan, pertsonaia bat iluntasunean dago, bere 'kuboa' (bere bizitza, bere bihotza) nahasita eta motel daukala. Baina elkartasun eta lagun baten argiari esker, dena aldatzen da.

ZAINDU ZAITEZ, ARGITU MUNDUA besteentzat LAGUN izaten!

Bideoan ikusi dugun bezala, gure argia ez da guretzat bakarrik, besteekin konpartitzeko da. Pazkoak horixe eskatzen digu: gure 'kubo' ilunak kolorez betetzea eta elkarri berpizten laguntzea. Zein keinu xumea egin dezakezu zuk besteak laguntzeko?

ZAINDU ZAITEZ, ARGITU MUNDUA BAIKORRAK IZATEN!

 Mateo ebanjelariak honela esaten du: “Zuek zarete munduarentzat argia. Zuen argiak denen aurrean egin behar du argi, zuen egintza onak ikusten direnean” (Mt.5,16)

Gaur “Gente luminosa” abestiarekin otoitz egingo dugu. Abestia entzun eta bere mezua barneratzeko isilune bat egingo dugu.

"Gente luminosa" abestiak positibotasunez eta baikortasunez betetako mezua du. Edozein egun ilun konpondu eta argiz betetako dohaina duten pertsona guztiei abesten die egileak.

Gaur eskerrak ematen ditugu gure egunerokoan laguntzen gaituzten pertsona guztiengatik. Gure bihotza izenez beteta dagoela, ilusioz ekin diezaiogun asteari.

Zein keinu errezak egin ditzakegu besteentzat argia izan gaitezen?

Zein ezaugarri ditu BAIKORRA den pertsona?

GARIZUMA: BERRIZ HASTEKO AUKERA

 Mateo ebangelariak hauxe esaten digu: “Egiten duzuna egiten duzula, zintzotasunez eta guztion onerako joka ezazula” (Mt 6, 6)

Gaur kanta bat entzungo dugu, “es tiempo de cambiar” titulua duen kanta. Kantak esaten digu askotan kanpoan zarata asko badago ere, gure barruan argi txiki bat dugula, piztu beharreko argi txiki bat alegia. Garizuma da argi hori pizteko garaia.

Garizuma gure barrua ordenatzeko eta zaintzeko garaia da. Jesusek hauxe esaten digu: Garizuman “Lasaitu pixka bat”, “Entzun zure barruan zer mugitzen den”, “Egin pauso txiki bat aurrera”… Ez dizu eskatzen perfektua izatea, zintzoa izatea baizik.

Zer izan liteke zure barneko zainketa egiteko behar duguna aste honetan?

Ideia batzuk: mugikorra apur bat gutxiago erabiltzea, norbaitekin hobeto portatzea,  barkamena eskatu edo eman, etxean laguntza txiki bat, mesede bat egitea inork ikusi gabe… Pauso txiki batek, bihotza handitzen du.

Otoitz txiki bat:

Jesús, lagundu iezaguzu Garizuma honetan barruan dugun argi txikia pizten. Ikas dezagula gelditzen, entzuten, zaintzen eta ongi egiten. Amen.

SARETU, BIHOTZETIK MUNDURA zure barrua ZAINDUZ!

Zein izango da aste honetan zure barruan piztuko duzun argi txikia?

Ez utzi biharko!

🌿 EMAKUMEEN NAZIOARTEKO EGUNA – EL PILAR IKASTETXEKO DEKALOGOA 🌿

1. Berdintasuna da gure desira, errespetua gure bidea. Berdintasuna ez da egun bateko helburua, egunero eraikitzen dugun konpromisoa baizik.
2. Ez dugu onartzen komentario edo jokaera matxistarik. Mikromatxismoak identifikatu eta alde batera utziko ditugu.
3. Pertsona guztiak errespetuz tratatuko ditugu, genero-identitatea, orientazio sexuala, ideiak edo ezaugarri fisikoak edozein direla ere.
4. Estereotipoak apurtuko ditugu, kiroletan, jantzietan eta eguneroko bizitzan. Ez dago “nesken gauzarik” edo “mutilen gauzarik”.
5. Parte-hartze orekatua sustatuko dugu, bai patioan, bai kirolean, bai proiektuetan eta lidergo-espazioetan.
6. Harreman osasungarriak eraikiko ditugu, errespetuan, berdintasunean eta konfiantzan oinarrituta.
7. Nire gorputza, nire erabakia. Adostasuna funtsezkoa da: mugak errespetatzea eta jazarpenik ez onartzea guztion ardura da.
8. Hizkuntza zainduko dugu, hitzek ere eraikitzen edo zauritzen dutelako. Sexismoa eta bazterketa ez ditugu normalizatuko.
9. Sare sozialetan jarrera kritikoa izango dugu, emakumeen sexualizazioa eta irudi sexistak zalantzan jarriz.
10. Eskuak elkartuz, mundu bidezkoago eta berdinzaleago bat eraikiko dugu, gure ikastetxetik hasita.

MARTXOAK 8

 San Paulok honela esaten du: «Ez dago gizonik, ezta emakumerik ere: denok bat zarete Jesusengan» (Gal 3,28). Aipu honek gogorarazten digu pertsona guztiek —emakumeek eta gizonek— duintasun bera dutela, balio bera, eta errespetu bera merezi dutela.

Aste honetan, martxoaren 8an hain zuzen ere, emakumeen eguna ospatzen dugu. Gogoratu nahi dugu munduan, oraindik ere, emakume askok ez dutela aukera bera ikasteko, lan egiteko edo segurtasunez bizitzeko. Eta, gure ingurura etorriz, ez gara ohartzen emakume askoren lana, zaintza eta ahalegina ez direla behar bezala aitortzen.

Horregatik, hau bezalako egunak bi gonbidapen egiten dizkigu:

Hausnartzera: Gure hitzek eta keinuek laguntzen al dute denok errespetuz eta berdintasunez tratatuta izatera? Edo, ohartu gabe, deberdintasunak sortzen ditugu?

Jardutera: Aldaketa txikiak ere garrantzitsuak dira: inor ez baztertzea, barre desegokiekin inor ez iraintzea, besteen ahotsa entzutea, guztiak ondo tratatu… Zein beste jarduera bururatzen zaizkizu?

Martxoaren 8rako mezu hau izan dezakegu buruan: Berdintasunik gabe ez dago justiziarik. Eta gure eskolan, lagun artean eta etxean, denon ardura da mundu zuzenagoa eraikitzea.

SARETU, BIHOTZETIK MUNDURA BERDINTASUNA ZAINDUZ!

Zer etortzen zaizu burura hau entzutean:

“Berdintasunik gabe, ez dago justiziarik”?

SARETU, BIHOTZETIK MUNDURA zure barrua ZAINDUZ!

Barruko lasaitasun txikia, egun handi baten hasiera

Aste berria hasten dugu, eta hasteko moduak, askotan, markatzen du eguna nola joango den. Eskuetan ez dugu beti mundua aldatzeko boterea, baina bai geure barnean lasaitasun une txiki bat sortzekoa. Lasaitasun apur batek eskolako giro osoa hobetzen laguntzen du.

Gaur pentsatu dezagun honetaz: lasaitasunak (nire barruko bakeak) kutsatzen du. Norbait eguna lasai hasten bada, bere ondoan dagoenak ere lasaiago arnasten du. Arnasa sakon bat, isiltasun segundo bat, hitz adeitsu bat… Horiek guztiak “barneko bakearen haziak” dira.

Eskolak erritmo bizia du askotan: lanak, frogak, talde-lanak, proiektuak… baina aurrean dugun lehen aukera hau da: eguna lasaitasunez eta argitasunez hartzea.

Juan ebanjelariak honela dio: “Nire bakea zuekin dago, nik ematen dudan bakea ez da munduak ematen duena.” (Jn 14,27)

Galdera pertsonala: Zer egin dezaket gaur nire barruan eta inguruan lasaitasun giroa sortzeko?

SARETU, BIHOTZETIK MUNDURA zure barrua ZAINDUZ!

Ikusi dugun bideoak MINUTU bateko ISILUNEA egitera gonbidatzen gaitu. Klasea hasi baino lehen, MINUTUKO ISILUNEA egingo dugu.

HAUSTERRE EGUNA eta HAUR MINBIZIAREN NAZIOARTEKO EGUNA

HAUSTERRE EGUNA, GARIZUMAREN HASIERA

Unetxo bat har ezazu. Pentsatu azken egunetan izan duzun momenturen batean ez zinela oso ondo ibili: agian norbaiti hitz zakarrak bota zenizkion, agian ez zenuen zure onena eman lanean, edo norbait nahigabetu zenuen konturatu gabe.

Gogoeta: Batzuetan gure bizitzan “pausa” botoia sakatzea beharrezkoa da. Gelditu, arnasa hartu, eta galdetu geure buruari: “Nora noa? Zerbait zuzendu behar al dut? Norbait hobeto tratatu? Ni neu hobeto zaindu?”

Zergatik da garrantzitsua? Ez garelako perfektuak, eta hobe da garaiz zuzentzea gaizki egiten duguna. Geure akatsetatik ikasi dezakegulako. Besteei eta geure buruari eraso gutxiago egiteko. Eta batez ere, geure bidea argiago eta garbiago egiten delako.

Jesusek ere behin eta berriz gonbidatzen zuen jendea gelditzera eta bere barrura begiratzera: “Zuen bihotza non dagoen, han egongo da zuen altxorra” (Lk 12,34).

Gure gaurko altxorra: Egun hauetan, gainera, badugu beste arrazoi bat gure bihotza zabaltzeko. Otsailaren 15ean Haur Minbiziaren Nazioarteko Eguna ospatzen da. Gaixotasun honi aurre egiten dioten umeen eta nerabeen indarra eta kemena urrezko lazoarekin irudikatzen da. Urrea balio handiko materiala delako, haur horien bizitza guretzat altxor bat den bezala.

Gaurko "pausa" honek balio diezagula haurrengan eta haien familiengan pentsatzeko, eta gure elkartasuna bidaltzeko. Garizuma, azken finean, zaren ONENA bihurtzea baita, eta horrek esan nahi du besteen sentimenduekin eta sufrimenduarekin bat egitea.

“Gaurko egunean, gauza txiki bat gutxienez hobeto egingo dut.” Hori nahikoa da pauso bat aurrera emateko.

SARETU, BIHOTZETIK MUNDURA!

Emakume eta Neska Zientzialariak: Oztopoak gainditzen eta etorkizuna sortzen

 “Eskatu eta emango zaizue; bilatu eta aurkituko duzue; joan eta irekiko zaizue” (Mt.7,7) Pasarte honek ideia garrantzitsua ekartzen du: galdetu eta ikertu, eta zientziaren bidez ezagutza berri bat lortzeko aukera izango dugu. Neska eta emakumeek ere jakin-min hori bultzatu eta aurkikuntza berriak egin ditzakete.

Emakume eta Neska Zientzialariak: Oztopoak gainditzen eta etorkizuna sortzen

Otsailaren 11n, Emakume eta Neska Zientzialarien Nazioarteko Eguna ospatzen dugu, emakumeek zientzian egindako ekarpenak aitortzeko. Historia luzean, zientzia askotan gizonen esparrua izan da, baina emakumeek, zailtasunak gaindituta, etengabe aldatu dute hori.

Marie Curie, Jane Goodall Ada Lovelace, Rosalind Franklin… haien izenak gure historiaren parte dira, baina, gaur egun, emakumeak eta neska gazteak zientzian pauso handiak ematen ari dira. Zientzia ez da genero bat edo besteentzako soilik; guztiok elkarrekin aurrera egin behar dugu, aurrerapenak eta deskubrimentuak lortzeko. Neska eta emakumeek, beren gaitasunak eta pasioa erabiliz, etorkizuna aldatzen jarraitzeko aukera daukagu.

Gogoratu: zientzia eta teknologiaren etorkizuna guztion esku dago, eta emakumeek ere horretan parte hartu behar dute, beti ere aukera eta gizarte justizia berdintasunean oinarrituta.

SARETU, BIHOTZETIK MUNDURA GUZTIOK ZIENTZIA EGITEN!

Zer oztopo gainditu behar izan dituzte emakumeek zientzian arrakasta lortzeko? Nola lagundu dezakegu zientzia guztion gauza izan dadin?

SARETU, BIHOTZETIK MUNDURA zure barruko HAZIA zainduz!

Markosen ebanjelioan hauxe entzuten dugu: “Mostaza-hazia bezalakoa izan: lurrean ereiten denean, hazi guztien artean txikiena da; baina ereiten denean, hazten da eta landare guztien artean handiena bihurtzen da.” (Mk. 4,31-32).

Otsaila normalean hilabete hotza da, baina lurpean, ikus ezin dugun lekuetan, hazi txikiak esnatzen hasten dira. Oraindik ez dugu ezer ikusten, baina barruan mugimendua dago, bizitza dago, hazteko gogoa dago.

Markosen ebanjelioan hauxe entzuten dugu: “Mostaza-hazia bezalakoa izan: lurrean ereiten denean, hazi guztien artean txikiena da; baina ereiten denean, hazten da eta landare guztien artean handiena bihurtzen da.” (Mk. 4,31-32).

Otsaila normalean hilabete hotza da, baina lurpean, ikus ezin dugun lekuetan, hazi txikiak esnatzen hasten dira. Oraindik ez dugu ezer ikusten, baina barruan mugimendua dago, bizitza dago, hazteko gogoa dago.

Gu ere horrelakoak gara. Batzuetan ez dugu aldaketa handirik ikusten gure bizitzan: ohitura berdinak, zailtasun berdinak, eztabaida berdinak… Baina barruan hazi txiki bat daukagu, eta hazi horrek badaki zertara deitzen gaituen:

·       Norbait laguntzera.

·       Hitz on bat esatera.

·       Norbere burua zaintzera.

·       Gaua iluna izan arren, biharamunean argia izango dela sinestera.

Hazia ez da handitzen egun batean. Pazientzia, konfiantza eta zaintza behar dira. Baina hazia zaintzen badugu, poliki-poliki, gure barnean gauza politak gertatzen hasten dira.

Gaurko galdera hau da: Zein hazi txiki zaindu nahi dut aste honetan? Zer aldatzen hasi naiteke pixkanaka? Gogoan izan: Hazia txikia da… baina indarra handia.

SARETU, BIHOTZETIK MUNDURA zure barruko HAZIA zainduz!

Zein ohitura on txiki landu nahi nuke aste honetan? Zein egoeratan nahi nuke pazientzia edo adeitasun gehiago izatea? Nor izan daiteke nire “hazia” lagunduko duen pertsona?

DENIP: Indarkeria-ezaren eta Bakearen Eskola Eguna

 Mateoren ebanjelioan hauxe entzuten dugu: “Zorionekoak BAKEAREN alde lan egiten dutenak, Jainkoaren seme-alabak deituko zaizkie eta” (Mt 5, 9).

Urtarrilaren 30a, Indarkeria-ezaren eta Bakearen Eskola Eguna da. Data hau Mahatma Gandhiren heriotzaren urteurrena delako aukeratu zen; izan ere, Gandhik erakutsi zigun posible dela mundua aldatzea eta injustizien aurka borrokatzea indarkeriarik gabe, soilik bakearen indarrez.

Gaur, guk ere eredu hori gureganatu nahi dugu. Izan ere, bakoitzak gure barnean argi bat dugu, eta gure esku dago argi hori piztea edo itzaltzea:

• Laguntzen dugunean, errespetatzen dugunean edo entzuten dakigunean, gure EGUZKIA pizten dugu eta ingurukoak argitzen ditugu.
• Baina, aldiz, iraintzen dugunean, oihuka hasten garenean edo norbait baztertzen dugunean, LAINO BELTZAK sortzen ditugu gure gelan eta gure bihotzetan.

Gaurko eguna aukera bat da gure gatazkak modu baketsuan konpontzeko eta iluntasuna dakarren indarkeria baztertzeko. Aukeratuko al duzu ARGIA IZATEA?

SARETU, BIHOTZETIK MUNDURA bakea eta argia nonahi eramaten!

Gogoratzen duzu norbaitek (lagun batek, irakasle batek...) keinu txiki batekin zuen eguna 'argitu' dizuen aldiren bat? Zer egin zuen?

BESARKADAREN NAZIOARTEKO EGUNA

Juan ebanjekariak honela dio: “Maitatu elkar, nik maite zaituztedan bezala” (Jn.15,12)

Aste honetan, urtarrilaren 21ean, besarkadaren Nazioarteko eguna da.

Besarkada bat

Besarkada batek bihotza hunkitzen du,

ongietorria ematen du eta bizitza eramangarriago egiten du.

Besarkada poztasunak partekatzeko modu bat da

baita bizitzaren une tristeak partekatzeko modu bat ere.

Besarkada batek gure lagunak maite ditugula esaten du.

Besarkada bat elkarri diogun maitasunaren ageriko keinua da.

Hitz zuzena lortzen ez dugunean sentitzen dugun maitasuna erakusteko modu ezin hobea da.

Zoragarria da, zeren besarkada bat, maitasun handiz emana

jasotzen duenarentzako oparia da.

Ez dio axola ez lekuak ez hizkuntzak, zeren besarkada beti baita ulertua.

 

Arrazoi horiengatik eta beste askorengatik…

gaur nire besarkadarik beroena bidaltzen dizut.

SARETU, BIHOTZETIK MUNDURA besarkada handi bat emanez!

Gaur, norbaiti besarkada bat emango diot eta irribarre batekin esango diot: “Zurekin nago”.

Pentsatu minutuko isilune batean nori emango diozu gaur besarkada bat?

SARETU, BIHOTZETIK MUNDURA HAUR MISIOLARIEN EGUNEAN!

 Aste honetan HAUR MISIOLARIEN eguna ospatuko dugu elizan. Munduan badaude haur asko gure laguntza eta otoitza behar dutenak. Denok izan gaitezke misiolari gure eguneroko bizitzan.

Markos ebanjelariak honetarako gonbidatzen gaitu: “Joan zaitezte mundu guztira eta iragarri Berri Ona.” (Mk.16,15 

Baina, zer da misiolari izatea? Misiolari izatea ez da soilik urrun joatea; gure eguneroko bizitzan ere misiolari izan gaitezke. Pentsa ezazu une batez: nork behar du nire laguntza gaur? Agian nire gelako norbait triste dago, edo etxean kontu delikatu batekin pazientzia behar da, edo kirol taldean konpondu neharreko zerbait dago, edo...

Misiolari izatea maitasuna, bakea eta itxaropena zabaltzea da, hitz eta keinu

txikien bidez. Zein keinu txiki egin ditzakezu zuk? Gaur, munduko haur askok ez dute gure erosotasunik: ez dute hiru otordurik egiten, ez dute eskolara joateko aukerarik edo gaixotuta daudenean ez daukate nora joan… Guk, berriz, denetatik daukagu. Agian, daukaguna konpartitu beharko genuke.

Asteko konpromezu: Keinu txiki bat egin ezazu: irribarre bat, laguntza eskaintza, edo hitz polit bat… gehien behar duenari. Etxean edo eskolan pazientziaz jokatu eta ez baztertuko inor

Bukatzeko, misioaren aldeko otoitz laburra egingo dugu: "Jainko Aita, eskerrik asko munduko haur guztiengatik. Lagundu iezaguzu bihotza zabaltzen, maitasuna eta bakea eramateko gure ingurura. Amen."

SARETU, BIHOTZETIK MUNDURA HAUR MISIOLARIEN EGUNEAN!

Zer da zuretzako MISIOLARIA den norbait?

Gustatuko litzaizuke MISIOLARI esperientzia izatea?

Hemen ere MISIOLARI izan zaitezke, nola?

SARETU, BIHOTZETIK MUNDURA EGUBERRITAKO ARGIA ZABALDUZ!

Urte Berri On guztioi eta ongi etorri!

Gabonen eta Urteberriaren ondoren, aukera berri bat izan dezakegu geure buruaz zerbait partekatzeko.

Joan ebanjelariak honela dio: “Jesusen ikasleak garela jakiteko seinalea elkarri diogun maitasuna da.” (Jn.13,35)

Eguberriak igaro dira. Urte berri hau ontasunez, edertasunez eta egiaz bete dezagun. Bakea, maitasuna eta batasuna munduko leku guztietara eraman ditzagun.

Urte berri honetan bizitzeko pista batzuk:

…zure inguruan gertatzen denaz jabe zaitez.

…zure ingurukoen sufrimenduarekiko adi egon zaitez eta lagun izan zaitez.

…denbora bilatu aspalditik ikusten ez duzun norbait bisitatzeko.

…Kanpaina solidarioetan parte har ezazu.

…inguratzen zaituen giroa alai ezazu.

…irribarre zabal batez bete ezazu zure aurpegia.

…otoitz egin, jan eta maita ezazu.

Jarraian bideo bat ikusiko dugu. Gabonetako OPARIen inguruan gogoeta egiten du. Zer gauza merezi dute oparitzea Gabonetan?

Giza esperimentu honetan 27 gaztek Gabonetako opariak aldatu zituzten. Zuk aldatuko zenuke oparia? Zer gauza merezi dute oparitzea?